Prishtinë, 3 nëntor 2025 – Shoqata e Grave në Shërbimin Korrektues të Kosovës (SHGSHKK), me mbështetjen e Misionit të OSBE-së në Kosovë, organizoi sot Konventën e saj Vjetore Strategjike, një ngjarje e rëndësishme që bashkoi përfaqësuese nga të gjitha institucionet e sigurisë dhe partnerë të shumtë ndërkombëtarë e vendorë.
Kjo Konventë kishte për qëllim të ofronte një hapësirë për diskutim të hapur dhe bashkëpunues mbi rolin dhe kontributin e grave brenda sistemit korrektues dhe sektorëve të sigurisë në Kosovë. Diskutimet u përqendruan në mënyrat konkrete për të forcuar pozitën e grave në nivele të ndryshme të vendimmarrjes, për të avancuar aftësitë e tyre udhëheqëse dhe për të promovuar përfaqësimin e barabartë në strukturat institucionale.
Pjesëmarrëset ndanë përvoja, sfida dhe ide për fuqizimin profesional të grave, si dhe për krijimin e një kulture institucionale gjithëpërfshirëse që vlerëson diversitetin dhe barazinë gjinore. U theksua rëndësia e përfshirjes aktive të grave në proceset strategjike dhe politike të institucioneve të sigurisë, duke e parë këtë si një faktor kyç për rritjen e efektivitetit dhe qëndrueshmërisë institucionale.
Përfaqësuesit e institucioneve të sigurisë vlerësuan punën dhe përkushtimin e Shoqatës së Grave në Shërbimin Korrektues të Kosovës, e cila me aktivitetet e saj po kontribuon në forcimin e rolit të grave, rritjen e kapaciteteve profesionale dhe në ndërtimin e një mjedisi pune që respekton parimet e barazisë dhe profesionalizmit.
Në përmbyllje të Konventës, u rikonfirmua përkushtimi për vazhdimin e bashkëpunimit ndërinstitucional dhe për zbatimin e politikave që mundësojnë pjesëmarrje të barabartë, zhvillim të vazhdueshëm profesional dhe përfaqësim më të gjerë të grave në të gjitha nivelet e sistemit korrektues dhe të sigurisë në vend.
