Në Qendrën Korrektuese në Dubravë është realizuar certifikimi i 15 zyrtarëve korrektues, të cilët kanë përfunduar me sukses trajnimin për Ndihmën e Parë.
Trajnimi është zhvilluar në kuadër të programeve të rregullta të ngritjes profesionale të stafit dhe ka pasur për qëllim forcimin e aftësive për reagim të shpejtë dhe të përgjegjshëm në situata emergjente, duke kontribuar drejtpërdrejt në rritjen e sigurisë brenda institucionit.
Ndër të certifikuarit është edhe një zyrtare korrektuese, njëkohësisht anëtare e shoqatës, e cila përfaqëson rolin dhe kontributin e rëndësishëm të gruas në Shërbimin Korrektues të Kosovës. Përfshirja dhe fuqizimi i grave në trajnime profesionale është dëshmi e përkushtimit institucional për barazi, profesionalizëm dhe ndërtim të një sistemi korrektues më gjithëpërfshirës.
Shërbimi Korrektues i Kosovës vazhdon të investojë në zhvillimin e kapaciteteve të stafit, duke e njohur dhe vlerësuar gruan si një shtyllë të rëndësishme në garantimin e sigurisë, etikës dhe cilësisë së shërbimit korrektues.
